प्रबर्धन सम्बादाता , ११ / २० / २०२४
निर्वाचन आयोगले आगामी निर्वाचनलाई स्वच्छ, निष्पक्ष र मर्यादित बनाउनका लागि निम्न मापदण्डहरू तोक्दै प्रेस बिज्ञप्ति जारी गरेको छ।
प्रचार-प्रसारको समयसीमा:
उम्मेदवारहरूले प्रचार-प्रसार गर्न पाउने अवधि मिति २०८१ मंसिर ६ गते (भोली)देखि मंसिर १३ गते राति १२:०० बजेसम्म तोकिएको छ।
प्रचार-प्रसार निषेध अवधि:
मिति २०८१ मंसिर १३ गते राति १२:०० बजेदेखि मतदान सम्पन्न नभएसम्म कुनै पनि प्रकारको प्रचार-प्रसार कार्य गर्न निषेध गरिएको छ।
आचारसंहिताको पालना:
निर्वाचन आयोगले मिति २०८१ मंसिर २ गतेदेखि निर्वाचन आचारसंहिता लागू गरिसकेको छ। यस कारण, राजनीतिक दलहरू, उम्मेदवारहरू, र सरोकारवाला व्यक्तिहरूले आचारसंहिताको अक्षरशः पालना गर्नुपर्नेछ।
मतदान समय:
मिति २०८१ मंसिर १६ गते आइतबारका दिन बिहान ७:०० बजेदेखि अपराह्न ५:०० बजेसम्म तोकिएका मतदान केन्द्रहरूमा मतदान हुनेछ।
निर्वाचन आयोगले सबै राजनीतिक दल, उम्मेदवार, र सरोकारवाला पक्षलाई यी मापदण्डहरूको पूर्ण पालना गर्न आग्रह गर्दछ। साथै, आयोगले सम्पूर्ण मतदाताहरूलाई समयमै मतदान केन्द्रमा उपस्थित भई आफ्नो अमूल्य मताधिकार प्रयोग गर्न हार्दिक आह्वान गर्दछ।
निर्वाचनको मर्यादा कायम राख्न आयोगले आवश्यक निगरानी र व्यवस्थापन गर्नेछ।
